பிரபஞ்சத்தைக் காப்பாற்றுங்கள்.........

புரியப் படாத பிரபஞ்சத்தின்
இயக்கத்தின் ஒரு புள்ளியான
நமக்கு பிரபஞ்சத்தைக்
காப்பாற்றும் வேலை......??

களைத்துக் கிடந்தவன் வந்து
இளைப்பாறத் தோள் எனும்
களம் கொடுத்துக் கனிவுடன்
களைப்பாற்றுங்கள்

மணல் எடுத்து
மணல் கொடுத்துப்
போவதைத் தவிர
வேறொன்றறியேன்
எனும் கடல் அலை
போல அன்பு செய்யுங்கள்

சுவர்கள் நடுவில் வாழும்
மனங்களை சுவர் உடைத்து
வெளிக் கொணரும்
சூழ்ச்சிகளைக்
கண்டு பிடியுங்கள்

மூச்சு விட முடியாத
கண்ணாடிக் குடுவைக்குள்
மாட்டிக் கொண்ட மீன்களை
விழுங்கும் மீன்களாய்.....
மனிதர்களைத் தின்னும்
மனிதர்களாய் மாறிக் கொண்டிருக்கும்
மனிதர்களை மீன் உருவிலிருந்தும்
கண்ணாடிக் குடுவையிலிருந்தும்
வெளிக் கொணருங்கள்

எதைத் தொலைப்போம்
அடுத்தது எனத் தெரியாமலே
ஒவ்வொன்றாய்த்தொலைத்து
முகம் தொலைத்து முழுதாய்த்
தொலைந்து போகும் முன்
மனிதம் காப்போம்....

மனத் திருப்தி மகத்தான பலம்.
அது கொண்டு ஊற்றெடுக்கும்
அளவிலாச் மனச்சக்தியைப் பெருக்குங்கள்
அனல் சக்தி பெறுங்கள்

வைக்கும் வெடிகுண்டுகள் பூக்காடாகும்
வித்தை கண்டு பிடியுங்கள்
தேசம் தொலைத்த மக்கள்
உலகம் தொலைக்கும் முன்
கண்டு பிடியுங்கள்
முயன்றால் முடியாதது இல்லை

பிரபஞ்சத்தின் கோடி நட்சத்திரங்களின்
முதல் ஒளித்துகள்
எங்கிருந்து புறப்பட்டது
பயமில்லாமல்?
முயன்றால் முடியாதது இல்லை

வீழும் விழுதுகளுக்குத் தெரியாது
மரம் தாங்குவது அதுவென்று.....
அப்படித் தாங்குங்கள் பிரபஞ்சத்தைத்
தன்னம்பிக்கையென்னும் விழுது கொண்டு....
முயன்றால் முடியாதது இல்லை